ياحزن وش اللي بقى منـك تهديـه
كل يوم تهدينـي مـن الهـم باقـه
خاويت قلـبٍ الفـرح مـا يخاويـه
وعنده من بنـوك التعاسـه بطاقـه
علاقتـه ويـاك غبـن ومشاريـه
علاقـة ٍ ياشينهـا مـن عـلاقـه
وياموت ويش اللي بقالـي تخبيـه
ماعاد لـي يامـوت للصبـر طاقـه
أكرهت حلو النوم يامـوت ماأبيـه
والزاد مـرن فـي لسانـي مذاقـه
اضحك وفي صدري من الحزن مافيه
ومال الفرح يامـوت بالقلـب فاقـه
ذود الحزن بالصدر زانت مراعيـه
في صدري المجروح مليـون ناقـه
الدمـع بعيونـي مرسـي مبانـيـه
وبيني وبين الحزن فزعـة صداقـه
الحزن صوب القلب عجله خطاويـه
ولا الفرح ياموت يشكـي الاعاقـه
دمعي نشف ياموت من عاد ببكيـه
خذيت مـن ربعـي أعـز الرفاقـه
ماتاخـذ الا كـل حـر ٍ هقـاويـه
فوق النجوم وصيدته تحـت ساقـه
عوق الحريب وعون للـي يخاويـه
محشوم من فعل الـردى والحماقـه
الكل منهم ثـوب الامجـاد كاسيـه
يشفق على فعل المراجـل إشفاقـه
كل ٍ إعيالـه بالذكـر تفتخـر فيـه
الذكر مثل العـود وقـت إحتراقـه
ياموت ويش اللـي بقالـي تخبيـه
خذيت مـن ربعـي أعـز الرفاقـه
الشاعر/ فيصل الوعيلي