بعد مر الفـراق اللـي سنينـه أجدبـت بالقـاع
وانا احفر فالثرى عن عذر يقنع شرهة اوجاعـي
تجيني بعد طول اغياب تسالني عـن الاوضـاع
تأمل في نحولي وانت تعرف وشهـي أوضاعـي
يمر من السنين اسنين واللي ضاع منهـا ضـاع
وانـا طـول الليالـي مانـي بغافـي ولاواعـي
تموت الخطوة اللـي للنوايـف ودهـا المطـلاع
وهـي ياناعـي الامـوات ماتلقـى لهـا ناعـي
ولالمت الرسايل يـوم طوعنـي زمـن ماطـاع
وهي تلهث على بابك وملـت وقفـت الساعـي
تدور في كفوفك عـن عـزا للخاطـر الملتـاع
ووصلك مثـل غيمـه بالمطـر مابللـت قاعـي
ومن بكره وفي بكره وانا فـي حاجتـي طمـاع
وهـي لـو انهـا بالجهـد ماقصـرت بذراعـي
لكن الحـظ يـوم انـا تعبنـا والبطـون جيـاع
مجوعني ومشبع ناس من مـدي ومـن صاعـي
لان القحط مايعرف وش اللي محـوج الـزراع
لانه لو عرف ماضاعت انصافـي ولا ارباعـي
فلو ان السفينـه روحـة فـي بحـرك الخـداع
على الريح الخطا يحسب ولايحسب على اشراعي
ولو ان المنادي يوم نادى أصغـت الـه اسمـاع
ماكان الصمت صاير شي مـن فنـي وابداعـي
ولن تحيا المشاعـر والليالـي كلبوهـا اوجـاع
بعد ماتت وهي حرجه مابيـن الذيـب والراعـي
لكن اسمع والك خطوه تودي والـدروب اوسـاع
والك تبرير فاطباعـك والـي تبريـر فاطباعـي
بعد طحنا وقمنا من غيابٍ مجـدبٍ بالقـاع
انا معذور لو قلـت الـك جيـه مالهـا داعـي
الشاعر/ فايز ابو رجيله